მითები ლუდის წარმოებაზე

რატომ  ჰგონიათ ადამიანებს, რომ ბაზარზე თავის დამკვიდრების შემდეგ, მწარმოებელი პროდუქტის ხარისხს აუცილებლად გააფუჭებს?

თავშესაქცევი მეცნიერება – ძალიან საინტერესო ფაქტები ლუდის შესახებ

…2009 წელს, როცა დიდი ბრიტანეთის სამხედრო კონტინგენტის მორიგი ნაკადი ავღანეთიდან სამშობლოში ბრუნდებოდა, სამხედრო-საჰაერო ძალების ხელმძღვანელობამ ჯარისკაცებს უჩვეულო სიურპრიზი მოუწყო: გამოიყო საკმაოდ დიდი თანხა, რათა ცხელი წერტილიდან დაბრუნებულებს, სადაც ალკოჰოლის მიღება სასტიკადაა აკრძალული, ლუდით ღირსეულად გამასპინძლებოდნენ.

ლუდი ძველად და ლუდი ახლა…

რა უნდა ვიცოდეთ ქართული თუ უცხოური ლუდის შესახებ!

თუკი სიტყვაში „პური“ ოთხ შეცდომას დავუშვებთ, შედეგს ასეთს მივიღებთ: „ლუდი“…მრავალი საუკუნის მანძილზე ლუდი ერთ-ერთი ყველაზე პოპულარული ალკოჰოლური სასმელია, რომელსაც ზოგ შემთხვევაში, ძალიან ბევრი კვების პროდუქტების წინაც კი აყენებს, ძალიან დიდი ადგილი უჭირავს მსოფლიოს პრაქტიკულად ყველა ქვეყნის ბაზრებზე და მოკლედ, ეს ყველაფერი დღესავით ნათელია.

ისტორიას თუ გადავხედავთ, დავრწმუნდებით, რომ ლუდი იხარშებოდა ჯერ კიდევ ისეთი ლეგენდერალი ხალხების დროს, როგორებიც იყვნენ მაგალითად, შუმერები, ხეთები, ურარტუელები, ბაბილონელები, ეგვიპტელები…

ლუდს კარგად იცნობდნენ უძველესი ქართველური ტომებიც. მაგალითად, მეცნიერები მიიჩნევენ, რომ ლუდის დამზადების საიდუმლოს კოლხები ჯერ კიდევ იასონისა და არგონავტების გმირული ეპოპეის დროს იყვნენ ნაზიარებნი.

უხსოვარი დროიდან დღემდე ლუდს განსაკუთრებული მნიშვნელობა და ადგილი ჰქონდა მინიჭებული საქართველოს მთაშიც. მთიელებისთვის ლუდი უძველესი დროიდან წმინდა სასმელად მიიჩნეოდა და ყველა წეს-ჩვეულება თუ რიტუალი სწორედ ლუდით სრულდებოდა.

შუმერები ვახსენეთ და აქვე ქართველი მკვლევარის, ელდარ ნადირაძის წიგნს „ქართული ლუდი“ მოვიშველიებთ, სადაც წერია, რომ ჯერ კიდევ უძველესი შუმერები ლუდის 18 სახეობას ამზადებდნენ.

იქვე იმასაც ვკითხულობთ, რომ ძველი ქართული ტერმინი „ქაშქ“  ნადუღარი ქერის წვენს აღნიშნავს, რაც სხვა არაფერია, თუ არა – ლუდი! მეცნიერები მიიჩნევენ, რომ ქართული „ქაშქ“  მიღებული უნდა იყოს შუმერული „ქაშ“- იდან, რომელიც ამ უძველეს ცივილიზაციაში ლუდის სხვადასხვა სახეობის სახელწოდება გახლდათ.

რატომ შემოინახა ლუდის მოხმარების ჩვევა მთამ და არა ბარმა, ეს უბრალო მიზეზით აიხსნება: საქართველოში უმთავრესი ყურადღება გადატანილი იყო ბარის მევენახეობა-მეღვინეობაზე. ქართული ეთნოგრაფიული მეცნიერებაც იმ ტერიტორიას, სადაც ვაზი ხარობს, ბარად მიიჩნევს, ხოლო სადაც არა – მთად, – განმარტავს ქართველი მკვლევარი.

ლუდის სახეობები

საერთოდ, როდესაც რაღაცის კლასიფიკაციას ეხება საუბარი, ერთი ნიშნით ყველაფრის განსაზღვრა საკმაოდ რთულია. ანალოგიური სიტუაციაა ლუდის შემთხვევაშიც, თუმცა გარკვეული სიზუსტის შემოტანა მაინც შესაძლებელია.

არსებობს ღია და მუქი ფერის ლუდები, მაგრამ ამავე დროს, ღია და მუქი ფერის ლუდი შეიძლება იყოს ორივე, როგორც ზედა დუღილის ასევე – ქვედა დუღილის.

მსოფლიოში ბევრად პოპულარული ქვედა დუღილის ლუდებია. მასზე მოდის მთელი წარმოების 80-90 პროცენტი და კომპანიებიც სწორედ ქვედა დუღილის პროდუქციას აწარმოებს.

რას ნიშნავს ეს ყველაფერი: ქვედა დუღილის ლუდებში გამოიყენება საფუარი, რომელიც გამორჩეულია უფრო ისეთი თვისებით, რომ დუღილის დამთავრების დროს დაბლა ჩამოილექება, ზედა დუღილის კი უფრო მაღლა ადის და ჩამოლექვა შემდეგ ხდება. ანუ პირველ შემთხვევაში გამოიყენება საფუარი, რომელსაც უფრო მსხვილი უჯრედები აქვს და რადგან სიმძიმე მეტი აქვს, იგი დაბლა უფრო ადვილად ჩამოდის. ზედა დუღილის შემთხვევაში უფრო ფქვილისებური უფრედებია, პატარა და შესაბამისად, შედარებით გვიან ილექება.

უფრო მნიშვნელოვანი სხვაობა მაინც ის არის, რომ ქვედა დუღილის ლუდების საფუარის შემთხვევაში დუღილი ხდება დაბალ ტემპერატურაზე: ბადაგი 13 – 15 გრადუსზე დუღდება, მაღალი დუღილის ლუდებზე კი უკვე 22 – 23 გრადუსია საჭირო და შედეგად სხვადასხვა ტიპის არომატი მიიღება.

ქვედა დუღილის შემთხვევაში ლუდს ახასიათებს მკვეთრად გამოხატული ბადაგის არომატი ოდნავ კარამელისა და სვიის არომატი, ზედა დუღილის შემთხვევაში მეტად დამახასიათებელია ხილისა და პარფიუმერიის, ღვინის ტიპის არომატები. აქედან გამომდინარე, მიიღება ორი სხვადასხვა და განსხვავებული ლუდი.

ესე იგი გავიგეთ, რომ არსებობს მუქი და ღია ფერის და ქვედა და ზედა დუღილის ლუდები. გარდა ამისა, ასევე არსებობს ლუდები, რომლებიც მიიღება კონკრეტულად 100 პროცენტი ალაოსგან. ისეთ ქვეყნებში კი, სადაც აქვთ ადგილობრივად, მაგალითად, ხორბლის, ქერის, სიმინდის, ბრინჯის მეურნეობები, წარმოებაში მათაც ამატებენ. ზოგიერთ ქვეყანაში ასე ხდება იმიტომ, რომ პროდუქცია იაფია და მწარმოებლები ნაწარმის დაბალ ფასზე აკეთებენ გათვლას, ზოგან კი უბრალოდ იმიტომ, რომ მიიღონ ის არომატული და გემური თვისებები, როგორიც უფრო მეტად მოსწონთ.

როცა ქართულ ლუდზეა  საუბარი, მწარმოებელ კომპანიებშიც სწორედ  იმ მიმართულების განვითარება მოხდა, რომელიც უფრო ქართველებისთვისაა მიმზიდველი და მისაღები. გარდა იმისა, რომ არსებობს განსაკუთრებული ვიზუალი, არსებობს კიდევ ძალიან გამორჩეული გემო, რაც  მორგებულია სწორედ ქართულ ხასიათზე, თუმცა რასაკვირველია, უდიდეს მოწონებას იმსახურებს უცხოელების მხრიდანაც…

რა სარგებელი მოაქვს ლუდს ჯანმრთელობისთვის….

ლუდი ერთ-ერთი ყველაზე ფართოდ გავრცელებული ალკოჰოლური სასმელია. ღვინის შემდეგ ის ყველაზე უფრო ჯანსაღ სასმელად ითვლება.

მხოლოდ რაოდენობრივი პროგრესი

1996 წლიდან მოყოლებული, მას შემდეგ რაც საქართველო ოლიმპიურ თამაშებზე დამოუკიდებელი გუნდით და საკუთარი დროშით გამოდის, პირველად მოხდა, რომ წინა ოლიმპიადაზე ნაჩვენები შედეგის გაუმჯობესება ვერ მოხერხდა.  მიზნის მისაღწევად ქართველ სპორტსმენებს ლონდონის ოლიმპიადაზე 3 ოქროსა და 1 ვერცხლის მედალი სჭირდებოდათ, ან ვერცხლის ნაცვლად მინიმუმ 4 ბრინჯაო.
საბოლოოდ ქართულმა დელეგაციამ წინა შედეგებს ხარისხობრივად ვერა, მაგრამ რაოდენობრივად კი გადააჭარბა. ძიუდოისტ ლაშა შავდათუაშვილის ოქროს მოჭიდავეებმა ვლადიმერ ხინჩეგაშვილმა, რევაზ ლაშხმა და დავით მოძმანაშვილმა ვერცხლი, ხოლო მანუჩარ ცხადაიამ, დავით მარსაგიშვილმა და გიორგი გოგშელიძემ ბრინჯაო მიამატეს.  ქართულმა დელეგაციამ საერთო გუნდურ ჩათვლაში მექსიკასთან ერთად 39-ე ადგილი გაიყო.
ცხრილის სათავეში კი რა თქმა უნდა ამერიკის შეერთებული შტატები დარჩა. ბოლო – 46-ე ოქროს მედალი თავის ანგარიშზე საკალათბურთო ნაკრებმა ჩაიწერა.  “დრიმ თიმმა” ფინალში საკმაოდ დაძაბულ ბრძოლაში ესპანეთი დაამარცხა.
მეორე ადგილზე გასულ ჩინელთა პატივსაცემად ბრიტანულ მოედნებსა და დარბაზებში ჰიმნი 38-ჯერ აჟღერდა. გუნდური მესამე ადგილი კი მასპინძლებმა დაიკავეს, 29 ოქროთი.
ბოლოს კი იყო ოლიმპიადის დახურვის კაშკაშა და ფერადოვანი ცერემონიალი, რომლის დამლევსაც ოლიმპიური ესტაფეტა ბრაზილიურმა რიო დე ჟანეირომ გადაიბარა.

ვერცხლის და ბრინჯაოს დღე

საქართველოს ოლიმპიური დელეგაციის ლონდონური მარაგი გუშინ თითო ვერცხლითა და ბრინჯაოთი შეივსო. საგამოფენო ცენტრ “ექსელის” დარბაზში გაშლილი ხალიჩიდან მედლები თავისუფალი სტილით მოჭიდავეებმა გამოიტანეს.
120 კილოგრამ წონით კატეგორიაში დავით მოძმანაშვილი ფინალამდე ისე მივიდა, არც ერთ მეტოქესთან სეტიც არ დაუკარგავს. გადამწყვეტ ორთაბრძოლაში კი უზბეკეთის ნაკრების უხვტიტულა წევრთან, არტურ ტაიმაზოვთან დამარცხდა.  ცნობისთვის, ტაიმაზოვი ოლიმპიადის ფინალში ზედიზედ მეოთხედ გავიდა – 2000 წელს ვერცხლის მედალს დასჯერდა, 2004, 2008 და აგერ, 2012 წლებში კი კვარცხლბეკის უმაღლეს საფეხურზე ავიდა. 33 წლის სპორტსმენმა აქამდე მსოფლიოს ჩემპიონატის 2 ოქროს მედლის მოპოვებაც მოასწრო.
დავით მარსაგიშვილი (84 კგ) ოლიმპიური ჩემპიონობის ერთ-ერთ უმთავრეს კანდიდატად სახელდებოდა, მაგრამ მეოთხედფინალში მოულოდნელად პუერტორიკოელ ხაიმე იუსეპტ ესპინალთან დამარცხდა და საბოლოოდ მხოლოდ მესამე ადგილს დასჯერდა. 
სულ კი გუშინ მედლების 32 კომპლექტი გათამაშდა და აქედან 6 ოქრო რუსეთის დელეგაციამ მიითვალა. მათ განსაკუთრებით მძლეოსნობაში გაილაღეს. გამოსარჩევის 20 კილომეტრ დისტანციაზე სპორტულ სიარულში 20 წლის ელენა ლაშმანოვას მიერ დამყარებული მსოფლიოს რეკორდი.
შედეგიანი დღის შედეგად რუსებს ჯამში 21 ოქრო დაუგროვდათ და საერთო ჩათვლაში მე-4 ადგილს მათ ვეღარავინ შეეცილებათ, თუმცა ვერც თავად შეძლებენ მე-3 ადგილიდან მასპინძელთა ჩამოქვეითებას – ბრიტანელებმა გუშინ ოქროს მედლების საერთო რაოდენობა 28-მდე გაზარდეს.
იამაიკელმა სპრინტერმა უსეინ ბოლტმა ერთხელაც გაიბრწყინა ლონდონის ოლიმპიურ სტადიონზე. ამჯერად სამ თანამემამულესთან ერთად, 4X100 მეტრზე ესტაფეტაში, ოქროს მედალი მსოფლიოს რეკორდით მოიგო. მათ დისტანცია 36,84 წამში გაირბინეს და შარშან ნაჩვენებ თავიანთსავე სარეკორდო მაჩვენებელს 0,2 წამი ჩამოაჭრეს.
ამერიკელებმა 11 აგვისტოს საერთო გუნდურ ჩათვლაში ჩინელებს უკვე 6 ოქროთი გაუსწრეს. ეს კი უკვე იმას ნიშნავდა, რომ 4 წლის წინანდელ პეკინის ოლიმპიურ თამაშებზე განცდილი საერთო მარცხისათვის დამაჯერებელი რევანში აიღეს.
დაბოლოს, ერთი ნაკლებად მოსალოდნელი შედეგიც, რომელიც მამაკაც ფეხბურთელთა ფინალში დაფიქსირდა – ბრაზილიის ნაკრები მექსიკასთან დამარცხდა და ვერცხლს დასჯერდა.

მსაჯები მოკვეთეს, შედეგს ვერავინ შეცვლის

“ჭიდაობაში რომ ყველაფერი რიგზე იყოს და მსაჯები სამართლიან გადაწყვეტილებებს იღებდნენ, დღეს ოქროს მედალით გავიხარებდით” – თქვა გუშინ საღამოს საქართველოს ეროვნული ოლიმპიური კომიტეტის პრეზიდენტმა გია ნაცვლიშვილმა. ნახევარფინალში, ვლადიმერ ხინჩეგაშვილის მიერ, მეორე პერიოდის ბოლო წამებზე რუსეთის ნაკრების წევრ ოთარსულთანოვისთვის შესრულებული გდება აშკარად მომგებიანი იყო და ფინალისტის ვინაობა გადამწყვეტ პერიოდს უნდა გამოევლინა.
ნახევარფინალის შედეგი არა მარტო ნაცვლიშვილის და ქართველი გულშემატკივრების, არამედ საგამოფენო ცენტრ ექსელის საჭიდაო დარბაზში მყოფი ნეიტრალური მაყურებლის აბსოლუტური უმრავლესობის აზრითაც, მსაჯების არაობიექტური გადაწყვეტილების ბრალი იყო. ერთადერთი, ვისაც ცუდ მსაჯობაზე სიტყვაც არ უთქვამს, თავად ხინჩეგაშვილია. 21 წლის მოჭიდავე მხოლოდ საკუთარ თავს ადანაშაულებს, უფრო თამამად უნდა მეჭიდავა და არ წავაგებდიო.
ხინჩეგაშვილისა და ოთარსულთანოვის შეხვედრის მსაჯები ჭიდაობის საერთაშორისო ფედერაციის ხელმძღვანელობამ ოლიმპიადის ბოლომდე დისკვალიფიკაციით დასაჯა. ანალოგიური სანქცია გამოიტანეს მსაჯთა მაგიდის წევრებისთვისაც, რომლებმაც სადავო ეპიზოდის ვიდეოჩანაწერის ნახვის შემდეგ უსამართლობაზე თვალი დახუჭეს.
დამნაშავეები კი დასაჯეს, მაგრამ ამით ქართველები ვერაფერ ხეირს ვნახავთ. რუსეთის ნაკრების წევრი უკვე ოლიმპიური ჩემპიონია, ქართულ ოლიმპიურ ყულაბაში კი 1 ოქროს, 2 ვერცხლისა და 1 ბრინჯაოს მედალია.
გუშინვე ლონდონურ ხალიჩაზე დავით ხუციშვილიც (74 კგ) გავიდა, მაგრამ მეოთხედფინალში რუსეთის სახელით მოჭიდავე აფხაზ დენის ცარგუშთან დამარცხდა.  ბრინჯაოს მედლისთვის ბრძოლის გაგრძელების შანსიც მალევე დაკარგა, რადგან ცარგუშმა ფინალში ვერ გააღწია.
საერთო გუნდურ ჩათვლაში კი უკვე ამერიკელები ლიდერობენ.  სავარაუდოდ ამ უპირატესობას ხელიდან აღარ გაუშვებენ.

ლონდონში თავისუფლების დღეები იწყება

საქართველოს სპორტულ დელეგაციას ლონდონის ოლიმპიურ თამაშებზე სამივე სინჯის თითო მედალი დაუგროვდა. ძიუდოისტ ლაშა შავდათუაშვილის ოქროსა და ბერძნულ-რომაული სტილით მოჭიდავე რევაზ ლაშხის ვერცხლს ასევე “ბერძენ-რომაელმა” მანუჩარ ცხადაიამ თავისი წილი ბრინჯაო მიამატა.
ოლიმპიური კვარცხლბეკის თუნდაც მესამე საფეხურზე ასვლაც წარმატებაა, მაგრამ ცხადაიას შემთხვევაში შედეგი უფრო გულდასაწყვეტი აღმოჩნდა.
ევროპისა და მსოფლიოს ქართველი პრიზიორი ლონდონში ერთ-ერთი უმთავრესი ფავორიტის რანგში ჩავიდა, რადგან მისმა გამორჩეულმა კონკურენტებმა – რუსმა და აზერბაიჯანელმა მოჭიდავეებმა ყველასათვის მოულოდნელად, ოლიმპიური ლიცენზიები საერთოდ ვერ მოიპოვეს. ცხადაიამ სწორედ ისე დაიწყო, როგორც უნდა დაეწყო, მაგრამ ნახევარფინალში ძალა გამოელია და უნგრელ მეტოქესთან დამარცხდა. არადა მასთან აქამდე ჩატარებულ პირად შეხვედრებში გვარიანი უპირატესობა ჰქონდა.
“ფეხზე ძლივს ვიდექი. ენერგია ერთბაშად წამერთვა. ბოლო ორ თვეში 12 კილოგრამი დავიკელი და გამოვიფიტე. ორი შეხვედრის შემდეგ საშინლად დავიღალე. ძალების აღსადგენად დრო არ მეყო და ამდენი ხნის წვალება წყალში ჩამეყარა. კიდევ კარგი ბრინჯაო მაინც ავიღე. ამ შეხვედრის წინ 2 საათი მქონდა. გამოძინება მოვასწარი და უკვე კარგად ვიყავი” – თქვა ცხადაიამ დაჯილდოების ცერემონიალის შემდეგ.
ბერძნულ-რომაული სტილით მოჭიდავეებმა ოლიმპიადაზე გამოსვლა უკვე დაასრულეს. 10-12 აგვისტოს ხალიჩაზე თავისუფლები გავლენ და საქმეში 7 ქართველიც ჩაერთვება.
საერთო გუნდურ ჩათვლას კი ისევ ჩინეთი ლიდერობს, 36 ოქროს მედლით.  ამერიკელებს ორით ნაკლები აქვთ, ხოლო მესამე ადგილს მასპინძლები იკავებენ, 22 ოქროთი.
გუშინ ვაჟთა შორის 200 მეტრზე სირბილის ნახევარფინალები გაიმართა და საუკეთესო დრო იამაიკელმა იოჰან ბლეიკმა აჩვენა – 20,01, მეორე – ამერიკელმა უოლოს სპირმონმა (20,02), ხოლო მესამე – ფრანგმა კრისტოფ ლემეტრმა (20,03).  უსაინ ბოლტი ფინალში მხოლოდ მე-5 დროით – 20,18 გავიდა, თუმცა აშკარად “ნახევარი ძალით” ირბინა.
იაპონელმა ქალებმა გუშინ ორი ოქრო მიითვალეს. ორივე თავისუფალი სტილით ჭიდაობაში, 48 და 63 კილოგრამ წონით კატეგორიებში.
გამოვლინდნენ ვაჟ კალთბურთელთა ტურნირის ნახევარფინალისტები: ამერიკის შეერთებული შტატები არგენტინას დაუპირისპირდება, ხოლო ესპანეთი – რუსეთს.
კალათბურთისგან განსხვავებით, ფრენბურთში ამერიკელ ვაჟებს წარუმატებელი დღე ჰქონდათ – მეოთხედფინალში იტალიასთან წააგეს და ოლიმპიური ჩემპიონის ტიტულის შენარჩუნებაზე ფიქრი ნაადრევად დაასრულეს.
ვაჟ წყალბურთელთა ტურნირის ნახევარფინალში კი ხორვატია ჩერნოგორიას დაუპირისპირდება, იტალია – სერბეთს.

ვერცხლი, უსამართლობა და იმედგაცრუება

ბერძნულ-რომაული სტილით მოჭიდავე რევაზ ლაშხმა ქართულ ოლიმპიურ დელეგაციას მეორე მედალი მოუპოვა. 60 კილოგრამ წონით კატეგორიაში მოჭიდავე ქართველს ლონდონური კვარცხლბეკის უმაღლეს საფეხურამდე გადამწყვეტი გამარჯვებაღა დააკლდა და ვერცხლს დასჯერდა.
სატიტულო შეხვედრაში ლაშხი ირანელ მსოფლიოს ჩემპიონ ომიდ ჰაჯი ნორუზთან დამარცხდა – პირველ სეტში გადამწყვეტი ჩოქბჯენი ვერ გამოიყენა.  მეორეში კი, დაღლა დაეტყო, რითაც კარგად ისარგებლა ნორუზმა, მომგებიანი ქულა აიღო და ოლიმპიური ჩემპიონი გახდა.
6 აგვისტოს ქართველთათვის საინტერესო კიდევ ბევრი რამ მოხდა, ოღონდ არა სასიხარულო. ბერძნულ-რომაულ ჭიდაობაში სამეულში მოხვედრის შანსი ბოლო მომენტში გაუშვეს ხელიდან ვლადიმერ გეგეშიძემ (84 კგ) და გურამ ფერსელიძემ (120 კგ). ამ უკანასკნელის შემთხვევაში მარცხი ლოგიკური იყო. გეგეშიძე კი უმედლოდ არაობიექტურმა მსაჯობამ დატოვა – ნახევარფინალში მას სამქულიანი ილეთი მხოლოდ ერთი ქულით შეუფასეს და გამარჯვება რუს ხუგაევს მიანიჭეს.  მესამე ადგილისთვის შეხვედრის მიწურულს ქართველი ერთხელაც დაჩაგრეს – ბრინჯაოს მედლის გამნაღდებელი ორქულიანი გდება გაუუქმეს და ქულა და მედალი გეგეშიძის ყაზახ მეტოქეს აჩუქეს.  ქართულმა დელეგაციამ უსამართლობა დიდხანს აპროტესტა, მაგრამ უშედეგოდ. საბოლოოდ გეგეშიძემ და ფერსელიძემ მე-5 ადგილები დაიკავეს.
მორიგი იმედგაცრუება ქართველმა გულშემატკივრებმა ძალოსან გია მაჭავარიანისგან (105 კგ) მიიღეს.  არადა ყველაფერი ისე დაიწყო, მაჭავარიანის გულშემატკივრებს რომ გვაწყობდა – ჩემპიონობის ორი უმთავრესი ფავორიტი, რუსი ძალოსნები აკაევი და კლოკოვი შეჯიბრებას დაწყებამდე რამდენიმე საათით ადრე გამოეთიშნენ. მიზეზად ტრავმები დასახელდა, მაგრამ კულუარებში სულ სხვა მიზეზზე ალაპარაკდნენ, აქაოდა, რუსები საქმეს პატიოსნად არ უდგებოდნენ და როდესაც ფაქტის წინაშე აღმოჩნდნენ, დოპინგ-სკანდალში გახვევის შიშით ფიცარნაგზე გასვლა ვეღარ გარისკესო.
მთავარი ფავორიტი უკვე პოლონელი დოლეგა გახდა, მაგრამ… პირველი მოძრაობის – ატაცის შემდეგ ისიც ნაადრევად გამოეთიშა მედლისთვის ბრძოლას.  აქაც გაგვიმართლა. მაჭავარიანმა მხოლოდ მესამე ცდაზე შეძლო 185-კილოგრამიანი შტანგის აწევა და მეორე ადგილზე გასასვლელად ესეც ეყო. მეორე მოძრაობაში – აკვრაში კი ყველასთვის მოულოდნელად, ვერც ერთი ცდა ვერ გამოიყენა და ოლიმპიადა უშედეგოდ დაასრულა.
რაც შეეხება არაქართულ სიახლეებს, საერთო გუნდური ჩათვლის ზედა სამეულში ვითარება არ შეცვლილა – ჩინელებმა და ამერიკელებმა გუშინ მხოლოდ თითო-თითო ოქრო მიითვალეს, ბრიტანელებმა კი მარაგი ორი ოქროთი გაზარდეს.
განსაკუთრებით აღსანიშნავია ქალთა ჭოკით ხტომაში 30 წლის ამერიკელ ჯენიფერ სურის გამარჯვება და 30 წლის რუს ელენა ისინბაევას მარცხი.  ათენისა და პეკინის ოლიმპიადების გამარჯვებულმა, მსოფლიოს მოქმედმა ჩემპიონმა და მსოფლიოს რეკორდსმენმა 4,70 მეტრი სიმაღლე დაძლია და მესამე ადგილს დასჯერდა.

ჩინური სიხარული და იამაიკური გვირგვინი

საქართველოს ბერძნულ-რომაული სტილით მოჭიდავეთა ნაკრების წევრმა ზურაბ დათუნაშვილმა სადებიუტო ოლიმპიურ თამაშებზე მედლის მოპოვება ვერ შეძლო, მაგრამ მიზნის მისაღწევად ბოლომდე იბრძოლა და ქართველი გულშემატკივრები მისი გარჯით მაინც კმაყოფილნი დარჩნენ.  21 წლის  სპორტსმენმა პირველი ორი წრე დამაჯერებლად გაიარა, მაგრამ შემდეგ მეოთხედფინალში აზერბაიჯანელ ემინ აჰმადოვთან დამარცხდა. ხოლო, რაკიღა აჰმადოვი ფინალში ვერ გავიდა, დათუნაშვილმა ბრინჯაოსთვის ბრძოლის გაგრძელების შანსიც დაკარგა.
5 აგვისტოს ქართველთაგან ოლიმპიურ თამაშებში მხოლოდ დათუნაშვილი ჩაერთო. უცხოური ამბებიდან კი გამოსარჩევი საერთო გუნდურ ჩათვლაში ლიდერის შეცვლაა.  ჩინელებმა ამერიკელებისთვის ორი დღით დათმობილი პირველობა გუშინ ბადმინტონში, ტანვარჯიშში, წყალში ხტომასა და ძალოსნობაში მოპოვებული 5 ოქროს მედლით უკან დაიბრუნეს.
ბადმინტონში ჩინელმა ათლეტებმა ხუთი შესაძლებლიდან ხუთივე ოქრო მოიხვეჭეს. ანალოგიური შედეგიანობით გამოირჩევიან ამ ქვეყნის წყალში მხტომელებიც.
მინსია ვუმ უკვე მეექვსე ოლიმპიური მედალი მოიპოვა (4 ოქრო, 1 ვერცხლი, 1 ბრინჯაო) და ამით თავისი ყოფილი პარტნიორის გუო წინწინგის რეკორდი გაიმეორა.
ამერიკელები გუშინ მხოლოდ 2 ოქროს დასჯერდნენ. ოლიმპიადებზე უკვე მესამე ერთობლივი გამარჯვება მოიპოვეს ჩოგბურთელმა დებმა სერენა და ვინუს უილიამსებმა, რომელთაც ქალთა წყვილების შეჯიბრში სიდნეისა (2000) და პეკინის (2008) თამაშებზეც ემარჯვათ.
ლეგენდარული როჯერ ფედერერი კი ოლიმპიადის ერთეულთა ტურნირის ოქროს მედალს ვერც მეოთხე ცდაზე შეწვდა. ფინალში იგი ბრიტანელ ენდი მარეისთან სამსეტიან ბრძოლაში დამარცხდა. 

ეგებ ეს ფედერერისთვის კარიერის ბოლო მცდელობაც იყოს. შვეიცარიელი ვარსკვლავი 31 წლისაა.
5 აგვისტოს გვირგვინი მამაკაცთა შორის 100 მეტრზე ფინალური გარბენი იყო. ხალხით გადაჭედილ ოლიმპიურ სტადიონზე იამაიკელმა უსაინ ბოლტმა კვლავაც შეუდარებლად ირბინა და ოლიმპიური ჩემპიონის ტიტული ოლიმპიური რეკორდით დაიცვა – დისტანცია 9,63 წამში დაფარა.  ეს ოლიმპიადებზე ბოლტის მეოთხე უმაღლესი სინჯის მედალია.